Të dhënat e përfaqësimit gjinor në zgjedhjet për kryetar komune në Kosovë tregojnë për një përparim të ngadalshëm, por të qëndrueshëm në pjesëmarrjen e grave në garat lokale. Nga viti 2017 deri më 2025, numri i grave kandidate është rritur nga 8 në 20 – një rritje domethënëse prej 150%. Megjithatë, pavarësisht kësaj rritjeje në kandidim, përfaqësimi i grave të zgjedhura në poste ekzekutive lokale mbetet i ulët.

Në zgjedhjet e vitit 2017, asnjë grua nuk arriti të zgjidhej kryetare komune, ndërsa në vitin 2021 dy gra fituan mandatin e tyre. Në zgjedhjet e fundit të vitit 2025, nga 20 gra kandidate, vetëm një është zgjedhur kryetare komune. Kjo tregon se edhe pse barrierat për pjesëmarrje po zbuten gradualisht, pengesat strukturore dhe kulturore për përfaqësim efektiv mbeten të forta.

Në anën tjetër, numri i përgjithshëm i kandidatëve burra vazhdon të dominojë garën, duke ruajtur një përqindje shumë të lartë të të zgjedhurve. Në vitin 2025, nga gjithsej 185 kandidatë, 37 janë zgjedhur, ndërsa vetëm një prej tyre është grua. Kjo përbën më pak se 3% të numrit të përgjithshëm të kryetarëve të komunave.

Të dhënat nënvizojnë nevojën për politika të reja dhe masa mbështetëse që forcojnë pozitën e grave në garat për pushtet lokal – përfshirë mekanizmat për nxitjen e kandidimit, mbështetje financiare, trajnime për lidership, si dhe fushata vetëdijësimi për rolin e grave në qeverisje lokale. Vetëm përmes një angazhimi të përbashkët institucional dhe shoqëror mund të arrihet një përfaqësim i barabartë që pasqyron realisht strukturën e shoqërisë kosovare.

Kjo infografikë është realizuar në kuadër të projektit “Ajo Udhëheq: Luftimi i Gjuhës së Urrejtjes dhe Promovimi i Grave në Udhëheqjen Lokale”, me përkrahje Ambasada e Mbretërisë së Holandës në Kosovë.