Storiet e suksesit drejt angazhimit politik të grave asambleiste dhe sfidat/nevojat e vajzave të reja nga Komuna e Prishtinës, ishin dy nga temat kryesore të cilat u shtjelluan gjatë një diskutimi të përbashkët në mes grupit jo-formal të grave anëtare të Kuvendit të Komunës së Prishtinës dhe vajzave nga kjo Komunë.
Iniciativa për një bashkëbisedim të tillë ka ardhur nga grupi-jo formal i grave, me qëllim të motivimit të vajzave për vendimmarrje dhe aktivizëm më të madh, me anë të rrëfimit të historisë së tyre përgjatë rrugëtimit në politikë. Gjithashtu një pjesë shumë e rëndësishme e diskutimit i’u kushtua identifikimit të nevojave që kanë vajzat dhe gratë në komunitetin ku jetojnë, në mënyrën që problemet e tyre grupi jo-formal i grave anëtare të Kuvendit ti adresoj në Kuvendin e Komunës së Prishtinës.
Diskutimi është mbajtur në kuadër të projektit “Përtej barazisë numerike: Fuqizimi i grave anëtare të Kuvendeve të Komunave në Qeverisje lokale”, i cili ka për qëllim të forcojë avokimin dhe pjesëmarrjen aktive të grave në proceset politike, me fokus të veçantë të grave anëtare të Kuvendeve të Komunave në qeverisje lokale.
